Үлэҕэ түмэр дьоҕурдааҕа

Гаврил Егорович өр сылларга култуура управлениятын солбуйар начальнигынан улэлээн, улуус култуурата, духуобунаһа сайдарыгар эҥкилэ суох кылаатын киллэрсибит киһинэн буолар. Кини ис дууһатыттан култуура үлэтэ үрдүк таһымҥа тахсарыгар үлэлэһэн олоҕун култуура эйгэтигэр анаабыта.

Гаврил Егорович 1966 с. Лөгөй нэһилиэгэр төрөөбүтэ. Кини оҕо сааһыттан кэрэ эйгэтигэр тардыһыылаах этэ. Ол курдук оскуолаҕа үөрэнэр кэмнэригэр 1982 с. тэриллибит “Веснянка” үҥкүү бөлөҕөр дьарыктаммыта.

Оскуолабыт умнуллубат чаҕылхай түгэннэрин бэлэхтээбит “Веснянка” үҥкүү бөлөҕө киэҥ суолу арыйан, уһуйбут оҕолоро олоххо миэстэлэрин булалларыгар олук уурсубутун түмүгэр 1984 с. Гаврил Егорович оскуоланы бүтэрээт, култуура үлэһитэ буолар баҕатын толорон, Дьокуускайдааҕы култуурнай-сырдатар училище үҥкүү салаатыгарэ үөрэнэ киирбитэ. Биир сыл үөрэнээт Армия кэккэтигэр сулууспалаан кэлэн, үөрэҕин салҕаан  бүтэрбитэ.

            1989 с. училищены ситиһиилээхтик бүтэрэн Даалы сельскэй кулуубугар ананан үлэтин саҕалаабыта. Түөрт сыл устата Даалы үлэһит дьонун сынньалаҥнарын тэрийиигэ күүһүн-уоҕун ууран туран үлэлэспитэ, эдэр ыччаты түмэн гастроллары тэрийэрэ, араас өрүттээх тэрээһиннэри ыытан, бэйэтэ ведущайдаан, ыллаан-туойан, үҥкүүлээн дьон-сэргэ махталын ылбыта.

            Кини дьону түмэр, үлэҕэ кынаттыр айылҕалааҕа. Уус-Алдан култууратын управлениятыгар солбуйар начальнигынан үлэлиир кэмнэригэр чахчы үлэтигэр бэриниилээҕин, эппиэтинэстээҕин, салайааччы быһыытынан үрдүк таһымнааҕын бэлиэтии көрөн кини тула түмсүбүппүт. Ити кэмнэргэ бырайыагынан үлэлээһин, саҥа технологияны туттан үлэ хайысхаларын сайыннарар үлэ саҕаламмыта. Бырайыагы көмүскээһин быыстапка-дьаарбаҥкалара, ону тэҥэ фондаҕа үлэлээһин, араас таһымнаах үбүлүөйүнэй тэрээһиннэр, кэнсиэрдэр, бэстибээллэр, күрэхтэр, култуура бааллара көхтөөхтүк, үрдүк таһымҥа ыытыллаллара. Бу тэрээһиннэргэ барытыгар Гаврил Егорович сүҥкэн кылаатын киллэрсибитэ.

Киһи, үлэҕэ устар ууну сомоҕолуурунан буолбакка, киһи үлэҕэ оҥорор дьыалатынан, дьоҥҥо-сэргэҕэ сыһыанынан сыаналанар. Кини салайааччы быһыытынан дириҥ билиилээх, ханнык баҕарар боппуруоска ыйытыылаах буоллаххына тута эппиэттээн  сөхтөрөөччү, ону таһынан тыа кулууптарын үлэһиттэригэр сүбэлээн-амалаан күүс-көмө буолара. Сүрдээх чиэһинэй, аһаҕас майгылаах үлэһит киһи, чахчы даҕаны норуот киһитэ дэтэн, биир идэлээхтэрин кытта бииргэ буолан үлэҕэ көҕүлүүрэ. Төрөөбүт Лөгөйүн дьонугар-сэргэтигэр ис сүрэҕиттэн кыһаллан өйөбүл буолара.

Улууспутугар Гаврил Егрович сырдык кэриэһигэр анаммыт “Түмэр, көҕүлүүр киһибит этэ” кинигэ сүрэхтэниитин тэрээһинэ уонна Республикатааҕы «Вдохновение» диэн үҥкүү күрэҕэ  былааннанар.

            Сырдык ыралаах, дьоҥҥо-сэргэҕэ үтүө сыһыаннаах, олоҕун бүүс бүтүннүүтүн култуура сайдыытыгар анаабыт биир идэлээхпит, үлэлээбит үлэтэ үүнэр көлүөнэ ыччакка холобур буолан кэпсэнэ турдун.

СР култууратын туйгуна, Лөгөй нэһилиэгин бочуоттаах олохтооҕо, Кэптэнитээҕи Бүөтүр Оҕотоойоп  аатынан сынньалаҥ киин методиһа Вера Егоровна Сыроватская