Кыайыы… ийэ, оҕо, дьиэ-кэргэн үѳрүүтүн үксэппит, ѳрѳгѳйүн улаатыннарбыт, тѳлѳннѳѳх тыл, араас ѳҥүнэн оонньообут Кыайыы салюта чаҕыллыбыта 80 сылыгар анаммыт тэрээһиннэр Лөгөй нэһилиэгэр үрдүк таһымҥа ыытылыннылар. Ол курдук, ыам ыйын 5-9 күннэригэр “Георгиевскай лиэнтэ” аахсыйа, “Уруйдуубут Улуу Кыайыыны” Кыайыы 80 сылыгар ыытыллыбыт улуустаҕы бэстибээл кыайыылааҕа Лөгөй нэһилиэгин быыстапката, ыам ыйын 6 күнүгэр “Кыайыынан кынаттанан” улуустааҕы, өрөспүүбүлүкэтээҕи оскуола тыйаатырдарын көрүү күрэхтэрин Гран-При хаһаайыттара, Лөгөй лиссиэй “Сайдам” тыйаатырын айымньылартан тэттик туруоруулара, ыам ыйын 8 күнүгэр “Кыайыыга кынаттаабыт ырыалар” Саха Өрөспүүбүлүкэтин норуодунай артыыһа Владимир Заболоцкай уонна Лөгөй нэһилиэгин уус-уран самодеяельноһын улахан кэнсиэрэ, аан дойдуну аймаабыт адьырҕа өстөөҕү утары Лөгөй нэһилиэгин 142 буойунун албан аатыгар “Өйдүүбүт! Сүгүрүйэбит! Махтанабыт!” өйдөбүнньүк чүмэчи аахсыйата ыытылынна.
Ыам ыйын 9 күнүгэр “Улуу Кыайыыны уһансыбыттара” радиорепортаж, “Кыайыы парада”, “Өлбөт үйэлээх полк” аахсыйа “Улуу Кыайыы уостубат өрөгөйө” торжественнай митинг, “Саллаат хааһыта”,“Кыайыы вальса” бүтүн Арассыйатааҕы аахсыйалар, “Кыайыы транспора” бастыҥ бырааһынньыктаҕы тимир көлөнү көрүү күрэҕэ, кыайыыга туһуламмыт киинэлэр: “Снайпер Саха», «Журавли над Ильменем», «Рядовой Чээрин», «Дорога на Берлин” тэрээһиннэр Кыайыы 80 сылын өрөгөйүн үрдэтэн, история биир кэрдиис кэмин быһыытынан дьон-сэргэ болҕомтотун тарта.
Орто дойдубут олоҥхолоох олоҕун оҥкулун уурбут хорсун-хоодуот санаалаах эһэлэрбитигэр, сэрии, тыыл бэтэрээннэригэр хоолдьуктаах бэйэбит хоҥкуйан, сүһүѳхтээх бэйэбит сүгүрүйэн туран кинилэр үрдүк ааттарыгар барҕа махтал тылларын аныыбыт!
Кинилэр эйэни аҕалбыт, кѳҥүлү түстээбит кэскиллээх дьыалалара биһиги ѳйбүтүгэр-санаабытыгар сырдык сулус буолан Улуу Кыайыыны уһансыбыт хас биирдии саха саллаатын сырдык мөссүөнэ, албан аата эйэлээх олоххо, айар-тутар төрөөбүт дойдубут эдэр дьонун өйүгэр-санаатыгар, сүрэҕэр-быарыгар хаһан да умнуллуо суоҕа!
