Ил Дархан Айсен Николаев саха төрүт үгэһин чөл тутар, тыа хаһаайыстыбатын аһын-үөлүн дэлэтэр уонна тыа хаһаайыстыбатын үлэһитин суолтатын үрдэтэр туһуттан 2018 сыл сэтинньи 6 күнүнээҕи ыйааҕынан Саха Өрөспүүбүлүкэтигэр ыам ыйын 22 күнүн Сайылык күнүнэн бэллэрбитэ.
Бу тэрээһин чэрчитинэн ыам ыйын 22 күнүгэр Бүөтүр Оҕотоойоп аатынан сынньалаҥ киинигэр Сайылык күнүгэр аналлаах самаан сайыны айхаллыы керсөр дьоро күн ыытылынна. Уһун кыһыны этэҥҥэ туораан, күөххэ үктэнэр Ньукуолун уонна сайылык күннэрин уруйдуу көрсөн тэрээһин алгыстаах салама баайыытынан, алаадьынан айах тутуу сиэринэн-туомунан арылынна. Салгыы норуот үйэлэргэ муспут үтүө үгэһин үйэтитэр сыаллаах “Төбүрүөннээн түмсүөҕүн” оһуохай түһүлгэтэ уус-уран салайааччы Варя Федорова таһаарыытынан саҕаланна.
Аҕам саастаах ытык-мааны дьоммутун “Добун” эр дьон түмсүүтүн көҕүлээһининэн, үгэс быһыытынан “Байанай бэлэҕэ” кус миининэн күндүлээһин “Өбүгэ аһа” түмсүү минньигэс астаах сандалы остуолун тула тардылынна. Манна нэһилиэк олохтоохторо остуол тула олорон, ирэ-хоро кэпсэтэн, сайылыктааһыҥҥа аналлаах викторинаҕа кыттан, ырыа күнүгэр аналлаах тэттик күрэхтэргэ ыллаан-туойан тарҕастылар.
Ааспыт кэммит, уйгу-быйаҥ илгэлээх итэҕэлэ, үгэһэ билиҥҥи ыччаты үтүөҕэ-кэрэҕэ үөрэтэ турара кэнэҕэски көлүөнэ ыччакка туһаны эрэ аҕаллын!
